Türkmenistanyň Prezidenti Serdar Berdimuhamedowyň adyna ýurduň Garaşsyzlyk güni mynasybetli daşary ýurtly kärdeşlerinden, görnükli syýasatçylardan köp sanly gutlag hatlarynyň gelmegi dowam edýär.
«Türkmenistan» gazetiniň şu günki sanynda çap edilen gutlag hatlarynda, hususan-da, şeýle diýilýär:
"Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Hormatly jenap Prezident!
Bahreýn Patyşalygynyň halkynyň adyndan hem-de hut öz adymdan Garaşsyzlyk güni mynasybetli tüýs ýürekden gutlaglarymy, iň gowy arzuwlarymy ibermäge şatdyryn.
Gudraty Güýçli Allatagaladan Siziň Alyhezretiňize berk jan saglyk we bagtyýarlyk, Türkmenistanyň halkyna bolsa mundan beýläk-de abadançylyk, rowaçlyk dileýärin.
Siziň Alyhezretiňiz, Size belent hormat goýýandygym baradaky ynandyrmalarymy kabul ediň!
Hamad bin Isa AL HALIFA, Bahreýniň Patyşasy.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Siziň Alyhezretiňiz!
Size Türkmenistanyň Garaşsyzlygynyň 34 ýyllygy mynasybetli filippin halkynyň adyndan tüýs ýürekden gutlaglarymy beýan edýärin. Mümkinçilikden peýdalanyp, Filippinler bilen Türkmenistanyň arasyndaky dostlukly gatnaşyklaryň halklarymyzyň bähbidine mundan beýläk-de pugtalandyrylmagyna ygrarlydygymyzy ýene-de bir gezek tassyklamak isleýärin. Siziň Alyhezretiňize we Türkmenistanyň halkyna uly üstünlikleri, bagtyýarlyk arzuw edýärin.
Siziň Alyhezretiňiz, Size belent hormat goýýandygym baradaky ynandyrmalarymy kabul ediň!
Kiçi Ferdinand MARKOS, Filippinler Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Sizi Kuba Respublikasynyň halkynyň we Hökümetiniň adyndan Türkmenistanyň Garaşsyzlyk güni mynasybetli mähirli gutlaýaryn. Bu şanly sene biziň ýurtlarymyzyň arasyndaky dostlukly gatnaşyklary ösdürmäge hem-de pugtalandyrmaga ygrarlydygymyzy tassyklamak üçin ajaýyp mümkinçilikdir.
Siziň Alyhezretiňiz, Size belent hormat goýýandygym baradaky ynandyrmalarymy kabul ediň!
Migel Mario Dias-Kanel BERMUDES, Kuba Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Siziň Alyhezretiňiz!
Türkmenistanyň Garaşsyzlyk güni mynasybetli Size mähirli gutlaglarymy hem-de berk jan saglyk, bagtyýarlyk baradaky arzuwlarymy ibermäge şatdyryn. Şeýle hem Türkmenistanyň halkyna mundan beýläk-de ösüş, rowaçlyk arzuw edýärin.
Marokko Patyşalygy Türkmenistan bilen dostlukly gatnaşyklara ýokary baha berýär. Bu gatnaşyklaryň geljekde hem pugtalandyrylyp, biziň ýurtlarymyzyň özara bähbitli hyzmatdaşlygy üçin täze mümkinçilikleri açjakdygyna ynanýaryn.
Hormatlamak bilen,
MOHAMMED VI, Marokkonyň Patyşasy.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Hormatly jenap Prezident, gadyrly doganym!
Türkmenistanyň milli baýramy — Garaşsyzlyk güni mynasybetli Siziň Alyhezretiňizi we Türkmenistanyň dostlukly halkyny tüýs ýürekden gutlaýaryn.
Iki dostlukly ýurduň halklarynyň bähbidine hyzmatdaşlyk gatnaşyklarymyzyň mundan beýläk-de ösdürilmegi ugrunda tagallalary birleşdirmäge taýýardygymyzy beýan etmek isleýärin.
Siziň Alyhezretiňiz, Size belent hormat goýýandygym baradaky ynandyrmalarymy kabul etmegiňizi haýyş edýärin!
Mohammed Uld Şeýh GAZWANI, Mawritaniýa Yslam Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Palestina Döwletiniň we halkynyň adyndan, şeýle hem hut öz adymdan Siziň Alyhezretiňizi we türkmen halkyny Türkmenistanyň Garaşsyzlygynyň 34 ýyllygy mynasybetli tüýs ýürekden gutlaýaryn.
Ýurtlarymyzyň arasyndaky gatnaşyklaryň mundan beýläk-de ösdüriljekdigine ynanýaryn. Pursatdan peýdalanyp, Türkmenistanyň Palestina Döwleti üçin edýän tagallalarynyň ýokary baha mynasypdygyny bellemek isleýärin.
Siziň Alyhezretiňize berk jan saglyk, bagtyýarlyk, dostlukly türkmen halkyna bolsa rowaçlyk we abadançylyk arzuw edýärin.
Mahmud ABBAS, Palestina Döwletiniň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Siziň Alyhezretiňiz!
Indoneziýa Respublikasynyň Hökümetiniň we halkynyň adyndan Size we Türkmenistanyň halkyna Garaşsyzlyk güni mynasybetli tüýs ýürekden gutlaglarymy beýan edýärin. Bu şanly sene Türkmenistanyň özygtyýarlylygynyň, okgunly ösüşiniň aýdyň nyşanydyr. Goý, Türkmenistan parahatçylyk, howpsuzlyk we durnukly ösüş ruhunda geljek ýyllarda hem okgunly ösmegini dowam etsin!
Siziň Alyhezretiňiz, Size belent hormat goýýandygym baradaky ynandyrmalarymy kabul ediň!
Prabowo SUBIANTO, Indoneziýa Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Siziň Alyhezretiňiz!
Türkmenistanyň Garaşsyzlyk güni mynasybetli Size, ýurduňyzyň Hökümetine hem-de halkyna Günorta Afrika Respublikasynyň Hökümetiniň we halkynyň adyndan tüýs ýürekden gutlaglarymy, iň gowy arzuwlarymy beýan edýärin.
Pursatdan peýdalanyp, Siziň Alyhezretiňize berk jan saglyk arzuw edýärin we geljekde hem ýurtlarymyzyň arasyndaky dostlukly gatnaşyklary pugtalandyrmaga gyzyklanma bildirýändigimi tassyklaýaryn.
Siziň Alyhezretiňiz, Size belent hormat goýýandygym baradaky ynandyrmalarymy kabul ediň!
Matamela Siril RAMAFOSA, Günorta Afrika Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Hormatly jenap Prezident!
Türkmenistanyň Garaşsyzlyk güni mynasybetli Siziň Alyhezretiňize abadançylyk, ýurduňyzyň halkyna bolsa parahatçylyk we gülläp ösüş baradaky iň gowy arzuwlarymy beýan edýärin.
Kamboja bilen Türkmenistanyň arasyndaky dostlukly gatnaşyklar ösüş babatda uly mümkinçiliklere eýedir. Özara dialogyň, netijeli hyzmatdaşlygyň işjeňleşdirilmegi netijesinde ikitaraplaýyn gatnaşyklarymyzyň parahatçylygyň, özgertmeleriň we ýurtlarymyzyň gülläp ösüşiniň bähbidine täze ugurlar boýunça giňeldiljekdigine ynanýaryn.
Siziň Alyhezretiňize belent hormat goýýandygym baradaky ynandyrmalarymy kabul ediň!
Hormatlamak bilen,
Norodom SIAMONI, Kambojanyň Patyşasy.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Türkmenistanyň milli baýramy — Garaşsyzlyk güni mynasybetli Siziň Alyhezretiňizi tüýs ýürekden gutlaýaryn, türkmen halkyna bolsa mundan beýläk-de ösüş we abadançylyk arzuw edýärin.
Marselo Rebelo DE SOUZA, Portugaliýa Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Siziň Alyhezretiňiz!
Size we Türkmenistanyň dostlukly halkyna ýurduňyzyň Garaşsyzlyk güni mynasybetli tüýs ýürekden gutlaglarymy, iň gowy arzuwlarymy beýan etmäge şatdyryn. Bu gün umumy gymmatlyklara, özara hormat goýmaga esaslanýan berk dostluk gatnaşyklarymyzy, şeýle hem halklarymyzyň parahatçylyk, gülläp ösüş baradaky garaýyşlaryny özünde jemleýän umumy maksadymyzy tassyklaýan şanly senedir. Şu pursatda biz Bangladeş bilen Türkmenistanyň arasyndaky gatnaşyklary mundan beýläk-de pugtalandyrmaga, halklarymyzyň bähbidine hyzmatdaşlygymyzy özara gyzyklanma bildirilýän ugurlarda has-da giňeltmäge berk ygrarlydygymyzy tassyklaýarys.
Size berk jan saglyk, uzak ömür, bagtyýarlyk, Türkmenistanyň dostlukly halkyna bolsa parahatçylyk, ösüş, rowaçlyk arzuw edýärin.
Siziň Alyhezretiňize belent hormat goýýandygym baradaky ynandyrmalarymy kabul ediň!
Mohammed ŞAHABUDDIN, Bangladeş Halk Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Siziň Alyhezretiňiz!
Latwiýanyň halkynyň adyndan, şeýle hem hut öz adymdan Türkmenistanyň Garaşsyzlyk güni mynasybetli tüýs ýürekden gutlaglarymy beýan etmäge rugsat ediň! Latwiýa bilen Türkmenistanyň arasyndaky dostlukly gatnaşyklaryň geljekde hem halklarymyzyň abadançylygyny, gülläp ösüşini üpjün etmek ýaly umumy maksatlarymyza ýetmäge itergi berjekdigine ynanýaryn.
Siziň Alyhezretiňiz, Size çuňňur hormat goýýandygym baradaky ynandyrmalarymy, Türkmenistanyň halkyna bolsa parahatçylyk, gülläp ösüş baradaky iň gowy arzuwlarymy kabul ediň!
Hormatlamak bilen,
Edgar RINKEWIÇ, Latwiýa Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Türkmenistanyň Garaşsyzlyk güni mynasybetli tüýs ýürekden gutlaglarymy, Size berk jan saglyk we bagtyýarlyk, Türkmenistanyň halkyna bolsa gülläp ösüş, rowaçlyk baradaky iň gowy arzuwlarymy kabul ediň!
Ramçandra PAUDEL, Nepal Federatiw Demokratik Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Siziň Alyhezretiňiz!
Siziň Alyhezretiňize we Türkmenistanyň doganlyk halkyna Garaşsyzlyk güni mynasybetli gutlaglarymy ibermäge şatdyryn. Bu taryhy gün türkmen halkynyň özygtyýarlylygynyň, agzybirliginiň, yzygiderli ösüşleriniň buýsançly subutnamasydyr. Pakistan Türkmenistan bilen ozaldan dowam edip gelýän, özara ynanyşmaga, medeni ýakynlyga, parahatçylyk, durnuklylyk we abadançylyk ugrundaky umumy maksada esaslanýan doganlyk gatnaşyklara uly ähmiýet berýär. Söwda we energetika ulgamlarynda, sebitara hyzmatdaşlygyň çäklerinde ösdürilýän gatnaşyklarymyzyň netijesinde ýurtlarymyzyň arasyndaky ýakyn hyzmatdaşlygyň mundan beýläk-de pugtalandyryljakdygyna ynanýaryn.
Pursatdan peýdalanyp, Siziň Alyhezretiňize berk jan saglyk, bagtyýarlyk, Türkmenistanyň halkyna bolsa parahatçylyk, mundan beýläk-de ösüş, rowaçlyk baradaky iň gowy arzuwlarymy beýan edýärin.
Siziň Alyhezretiňize belent hormat goýýandygym baradaky ynandyrmalarymy kabul ediň!
Asif Ali ZARDARI, Pakistan Yslam Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Jenap Prezident!
Türkmenistanyň Garaşsyzlygynyň yglan edilmeginiň şanly baýramy mynasybetli Size we ähli türkmen halkyna gutlaglarymy hem-de parahatçylyk, abadançylyk baradaky arzuwlarymy iberýärin.
Rumyniýa bilen Türkmenistanyň arasyndaky syýasy-diplomatik gatnaşyklaryň halklarymyzyň bähbidine geljekde-de dürli derejede okgunly ösdüriljekdigine ynanýaryn. Rumyniýa Türkmenistanyň sebit we halkara derejede durmuşa geçirýän işlerine ýokary baha berýär hem-de halkara guramalaryň çäklerinde hyzmatdaşlygyň işjeňleşdirilmegini, ykdysady, medeni we bilim ulgamlarynda gatnaşyklaryň ösdürilmegini mundan beýläk-de goldamagyny dowam etdirer. Rumyniýa Ýewropa Bileleşigi bilen Türkmenistanyň arasyndaky ykdysady we pudaklaýyn hyzmatdaşlygyň netijeli dialog, özara bähbitli hyzmatdaşlyk ruhunda çuňlaşdyrylmagyny goldaýandygyny tassyklaýar.
Jenap Prezident, Size belent hormat goýýandygym baradaky ynandyrmalarymy kabul ediň!
Nikuşor DAN, Rumyniýanyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Hormatly jenap Prezident!
Sloweniýa Respublikasynyň raýatlarynyň adyndan, şeýle hem hut öz adymdan Sizi Türkmenistanyň Garaşsyzlyk güni bilen tüýs ýürekden gutlamaga, ýurduňyzyň halkyna parahatçylyk, hemmetaraplaýyn ösüş, abadançylyk arzuw etmäge rugsat ediň!
Sloweniýa bilen Türkmenistanyň arasyndaky özara hormat goýmaga, ynanyşmaga we hyzmatdaşlyga esaslanýan dostlukly gatnaşyklaryň pugtalandyrylýandygyny kanagatlanma bilen bellemek isleýärin. Hyzmatdaşlygymyz özara gatnaşyklary ikitaraplaýyn we köptaraplaýyn görnüşde mundan beýläk-de çuňlaşdyrmak üçin berk binýady emele getirýär. Dialogyň, bilelikdäki tagallalaryň netijesinde raýatlarymyzyň bähbidine hyzmatdaşlygymyzy mundan beýläk-de pugtalandyrjakdygymyza, ählumumy parahatçylyga, durnuklylyga we özara düşünişmäge goşant goşjakdygymyza ynanýaryn.
Hormatly jenap Prezident, Size çuňňur hormat goýýandygym baradaky ynandyrmalarymy kabul ediň!
Nataşa PIRS-MUSAR, Sloweniýa Respublikasynyň Prezidenti.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Sizi we ähli türkmen halkyny Türkmenistanyň Garaşsyzlyk güni bilen gutlaýaryn, ýurduňyzyň ösüşiniň, halkyňyzyň abadan durmuşynyň bähbidine alyp barýan işleriňizde üstünlik arzuw edýärin.
Kim Çen YN, Koreýa Halk Demokratik Respublikasynyň Döwlet işleri boýunça Başlygy.
* * *
Onuň Alyhezreti,
Türkmenistanyň Prezidenti
jenap Serdar BERDIMUHAMEDOWA
Siziň Alyhezretiňiz!
Türkmenistanyň Garaşsyzlyk güni mynasybetli Size tüýs ýürekden gutlaglarymy, ýurduňyza we türkmen halkyna bolsa abadançylyk, gülläp ösüş baradaky iň gowy arzuwlarymy beýan etmäge rugsat ediň!
Siziň Alyhezretiňize belent hormat goýýandygym baradaky ynandyrmalarymy kabul ediň!
Aleksandr STUBB, Finlýandiýa Respublikasynyň Prezidenti."
Türkmenistanyň Eýran Yslam Respublikasyndaky ilçihanasy Ykdysady Hyzmatdaşlyk Guramasy (YHG) bilen Eýranyň arasynda geçirilen Ikinji milli forumyma gatnaşdy. Forum düýn EYR-nyň Daşary işler ministrliginiň Syýasy we halkara barlaglar merkezinde geçirildi.
Türkmenistanyň Daşary işler ministrliginiň habar bermegine görä, forumyň maksady YHG-na agza ýurtlaryň arasynda ykdysady, tehnologik we aragatnaşyk hyzmatdaşlygyny seljermek, şeýle hem guramanyň ösüşiniň täze strategiýasyny taýýarlamak boýunça bilermenlik tekliplerini işläp düzmekden ybarat boldy.
Forumyň çäklerinde üç ýöriteleşdirilen mejlis geçirildi: «Sebitleýin aragatnaşyk we kommunikasiýa», «YHG we täze tehnologiýalar» hem-de «ECO Vision 2035».
Türkmenistan bilen Ykdysady Hyzmatdaşlyk Guramasynyň arasynda köp ýyllaryň dowamynda özara peýdaly, konstruktiw we köpugurly hyzmatdaşlyk dowam etdirilýär.
Çeşmäniň bellemegine görä, türkmen tarapy bu guramanyň işjeň agzasy hökmünde iki ýurduň arasynda ýola goýlan ykdysady hyzmatdaşlygy ösdürmäge gönükdirilen işlere yzygiderli gatnaşýar.
Türkmenistanyň Ministrler Kabinetiniň Başlygynyň orunbasary, daşary işler ministri Raşid Meredow 14-nji sentýabrda Dohada Kataryň halkara hyzmatdaşlyk boýunça döwlet ministri Mariam bint Aly bin Nasser Al-Misnad bilen duşuşdy. Duşuşyk duşenbe güni Dohada geçiriljek adatdan daşary Arap-Yslam sammitine taýýarlyk boýunça ministrleriň duşuşygynyň çäklerinde boldy.
Kataryň daşary syýasat edarasynyň habar bermegine görä, duşuşygyň dowamynda taraplar iki ýurduň arasyndaky hyzmatdaşlygyň ösüşini, ony goldamagyň we pugtalandyrmagyň ugurlaryny, şeýle-de özara gyzyklanma döredýän birnäçe meseleleri ara alyp maslahatlaşdylar.
Adatdan daşary Arap-Yslam sammitine taýýarlyk boýunça daşary işler ministrleriniň duşuşygy ýekşenbe güni Kataryň Premýer-ministri we daşary işler ministri şeýh Muhammed ben Abdelrahman ben Jasem Al-Taniniň başlyklygynda geçirildi. Çärä Arap döwletleriniň ligasynyň hem-de Yslam Hyzmatdaşlyk Guramasynyň agza döwletleriniň daşary işler ministrleri gatnaşdylar.
6 — 8-nji sentýabr aralygynda Türkmenistanyň demir ýol ulaglary ministri M.Akmämmedowyň ýolbaşçylygyndaky wekiliýet Eýran Yslam Respublikasyna iş saparyny amala aşyrdy.
Türkmenistanyň DIM-iniň habar bermegine görä, saparyň dowamynda Eýran Yslam Respublikasynyň ýol we şäher gurluşyk ministri F.Sadeg hem-de ýol we şäher gurluşyk ministriniň orunbasary, Demir ýol edarasynyň müdiriýetiniň başlygy J.Zakeri bilen duşuşyklar geçirildi. Şeýle hem wekiliýetiň agzalary wagonlary dolandyryş merkezi we Tähran şäherinde ýerleşýän «Aprin» gury portunyň mümkinçilikleri bilen tanyşdylar.
Duşuşyklarda Türkmenistan bilen Eýran Yslam Respublikasynyň arasyndaky söwda-ykdysady hyzmatdaşlygyň çäklerinde demir ýol pudagy boýunça alnyp barylýan işler bilen bagly meseleler ara alnyp maslahatlaşyldy.
Hususan-da, üstaşyr geçýän ýükleriň dolanyşygyny artdyrmak boýunça degişli teklipler berildi. Şunuň bilen baglylykda, Hytaý — Gazagystan — Türkmenistan — Eýran demir ýolunyň hem-de Aşgabat ylalaşygy (Özbegistan, Türkmenistan, Eýran, Oman ugry boýunça) esasynda döredilen halkara ulag geçelgesiniň işjeňligini ýokarlandyrmak meseleleri ara alnyp maslahatlaşyldy.
Ykdysady Hyzmatdaşlyk Guramasyna agza ýurtlaryň arasyndaky ýük dolanyşygyny artdyrmak bilen bagly demir ýol ulgamy boýunça hyzmatdaşlygy giňeltmek hem-de Ermenistan — Eýran — Türkmenistan — Gazagystan üstaşyr ulag geçelgesi boýunça ýük daşamak we bu ugry netijeli peýdalanmak boýunça hem pikir alşyldy.
Mundan başga-da, taraplar Akýaýla — Inçeburun demir ýol geçelgesine baryp gördüler we ol ýerde alnyp barylýan işler bilen ýakyndan tanyşdylar.
https://www.mincom.gov.tm/ru/news/15083/
Şu gün Türkmenistanyň Döwlet medeniýet merkeziniň Mukamlar köşgünde her ýyl Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde dutarçy bagşy-sazandalaryň arasynda guralýan «Çalsana, bagşy!» bäsleşiginiň jemleýji tapgyry geçirilýär. Şu mynasybetli Prezident Serdar Berdimuhamedow bäsleşige gatnaşyjylara Gutlag iberdi.
«Türkmenistan» gazetinde çap edilen Gutlagynda döwlet Baştutany şeýle belleýär:
«Mähriban Watanymyzyň ýaş bagşy-sazanda ýigitleri we gyzlary!
Gadyrly ýaşlar!
Sizi Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde dutarçy bagşy-sazandalaryň arasynda geçirilýän «Çalsana, bagşy!» bäsleşiginiň jemleýji tapgyryna gatnaşmagyňyz mynasybetli tüýs ýürekden gutlaýaryn.
Garaşsyz, baky Bitarap Türkmenistanyň hemişelik Bitaraplygynyň şanly 30 ýyllyk baýramy giňden bellenilýän Halkara parahatçylyk we ynanyşmak ýylynda ýurdumyzyň halkara abraýy belent derejelere göterilýär, eziz Watanymyzda bagtyýar halkymyzyň toýlary toýlara ulaşýar. Ähli ulgamlarda gazanylýan uly üstünlikler, ýetilýän belent sepgitler Diýarymyzyň ykdysady kuwwatyny has-da pugtalandyrýar.
Türkmen halkynyň Milli Lideri Gahryman Arkadagymyz tarapyndan başy başlanan beýik özgertmeler Berkarar döwletiň täze eýýamynyň Galkynyşy döwründe üstünlikli dowam etdirilip, Watanymyzy tanalmaz derejede özgerdýär. Mukaddes Garaşsyzlygymyzyň 34 ýyllyk baýramyny mynasyp sowgatlar bilen garşylamak üçin häzirki wagtda bagtyýar watandaşlarymyz ähli ulgamlarda halal we netijeli zähmet çekýärler.
Gadyrly ýaş bagşy-sazandalar!
Häzirki döwürde ýurdumyzyň ähli ulgamlary bilen birlikde, medeniýet ulgamy hem uly ösüşlere eýe bolýar. Medeniýet ulgamynyň kämilleşdirilmegi halkymyzyň döredijilik kuwwatyny artdyrmaga, jemgyýetimizde watansöýüjilik, agzybirlik, ynsanperwerlik ýörelgelerini dabaralandyrmaga uly ýardam berýär. Ýurdumyzyň medeniýet edaralarynyň maddy-enjamlaýyn binýadyny berkitmek, täze medeni maksatly binalary gurmak, milli medeniýetimizi, sungatymyzy, edebiýatymyzy ösdürmek, döredijilik işgärlerini höweslendirmek babatda iri möçberli döwlet maksatnamalary üstünlikli amala aşyrylýar. Türkmen halkynyň köp asyrlaryň dowamynda kemala getiren milli bagşyçylyk sungatyny kämilleşdirmäge, täze aýdym-sazlar bilen baýlaşdyrmaga, il içinden sungata höwesli ýaş bagşy-sazandalary ýüze çykarmaga döwletimiz tarapyndan uly üns berilýär. Türkmenistanyň Prezidentiniň «Türkmeniň Altyn asyry» atly baýragyny almak ugrundaky bäsleşigiň çäklerinde dutarçy bagşy-sazandalaryň arasynda geçirilýän «Çalsana, bagşy!» bäsleşigi hem geljekde aýdym-saz sungatyny has-da ösdürmäge ukyply nesilleri ýüze çykarmakda, olary höweslendirmekde özboluşly ähmiýete eýedir.
Mähriban bagşy-sazandalarymyz!
Türkmen halkynyň Milli Lideri Gahryman Arkadagymyz «Ile döwlet geler bolsa...» atly kitabynda: «Halk arasynda «Bagşyly halk — bagtly halk» diýilýär. Hemme döwürlerde bagşy hoş habaryň buşlukçysy, şatlygyň hem parahat durmuşyň jarçysy hökmünde görlüpdir» diýip, parasatlylyk bilen belleýär. Aýdym-saz sungaty halkymyzyň milli gymmatlyklarynyň biridir. Türkmen halky ençeme asyrlaryň dowamynda aýdym-sazy özüniň ruhy syrdaşyna öwrüp geldi. Dutardyr gyjagyň sazlaşykly owazyndan dörän şirin aýdym-sazlar nesilleri watançylyk ruhunda terbiýelemekde, il içinde tutulýan toýlaryň şatlyk-şowhunyny artdyrmakda örän ähmiýetli bolupdyr. Hut şoňa görä-de, ata-babalarymyz aýdym-sazyň ynsan kalbyna täsir edýän joşgunly güýje eýedigine ynanypdyrlar, bagşyçylyk sungatyny toýlarynyň bezegine öwrüpdirler. Dutarda ýaňlanýan mukamlar halkyň kalbyna ganat bekledipdir, Watan, il-gün üçin beýik işlere ruhlandyrypdyr.
Hakdan berlen tebigy zehini, ussatlygy bilen il arasynda meşhur bolan halypa bagşy-sazandalarymyzyň ýerine ýetiren aýdym-sazlary halkyň hakydasynda baky orun aldy. Kel bagşy, Hally bagşy, Muhy bagşy, Ablyesen bagşy, Gurban bagşy, Garly bagşy, Pälwan bagşy, Palta bagşy, Bazar bagşy, Hydyr bagşy, Girman bagşy, Oraz salyr, Nazar baga, Nursähet Halsähet, Ýazmuhammet Köse, Hanmämmet gyjakçy, Öre şyh, Baky Maşakow, Şamyrat Gurbannepesow, Juma Wellekow, Gurt Ýakubow, Annageldi Jülgäýew, Saryhan Sapaýew ýaly meşhur ussatlarymyzdan miras galan aýdym-sazlar ýaş bagşy-sazandalarymyz üçin nusgalyk mekdep boldy.
Gadyrly ýaş bagşy-sazandalar!
Siz ajaýyp döwrümizde milli medeniýetimizi we sungatymyzy ösdürmek ugrunda döredilen şertlerden ýerlikli peýdalanyp, geljekde-de özüňiziň sungata söýgiňiz bilen türkmen bagşyçylyk sungatyny has-da kämilleşdirmek üçin döredijilikli zähmet çekmelisiňiz. Türkmen dutarynyň hem-de gyjagynyň joşgunly owazynyň dünýäde belent ýaňlanmagy ugrunda juwan kalbyňyzda ylhamyňyz, zehiniňiz hemişe gaýnap durmalydyr.
Siziň ähliňizi ýurdumyzda dutarçy bagşy-sazandalaryň arasynda geçirilýän «Çalsana, bagşy!» bäsleşiginiň jemleýji tapgyryna gatnaşmagyňyz hem-de mukaddes Garaşsyzlygymyzyň 34 ýyllyk baýramy mynasybetli tüýs ýürekden gutlaýaryn. Size jan saglygyny, türkmen bagşyçylyk we sazçylyk sungatyny täze aýdym-sazlar bilen baýlaşdyrmakda döredijilik üstünliklerini arzuw edýärin».